गजल

अहिना नै दिलदारी छै
ई चक्कर सरकारी छै

जे सभ गेलै जनता लग
सेहो सभ दरबारी छै

असगर रहतै दुनियाँमे
ई केहन बुधियारी छै

सहयोगक आसा किछु नै
बस अगबे टिटकारी छै

बाहर बाहर अमरित रस
भीतरमे महकारी छै

सभ पाँतिमे 22-22-22-2 मात्राक्रम अछि। ई बहरे मीर अछि। सुझाव सादर आमंत्रित अछि। 

रुबाइ

सगरो मैथिली साहित्य दहकैत अछि

नव नव विधाक आँच आइ पजरैत अछि

कोटी नमन जिनकर बिछल जारैन अछि 

बारल आगि विदेहक 'मनु' लहकैत अछि 

                    ✍🏻 जगदानन्द झा ‘मनु’

गजल

सत्य कहि केकरो बुझेनाइ मानू
साँपकेँ गुदगुदी लगेनाइ मानू

के कहाँ की कते लऽ जेतै दऽ जेतै
प्रश्न पूछब समय गमेनाइ मानू

आसपर लूटि लेत सरकार सभटा
बस अहाँ एकरा लुटेनाइ मानू

बंधु सभ तोप दागि मच्छर उड़ाबथि
ईहो दुश्मन जकाँ उड़ेनाइ मानू

जे जहाँ भेटि गेल आशा निराशा
अंतमे एकरे कमेनाइ मानू

सभ पाँतिमे 212-212-122-122 मात्राक्रम अछि। गजलमे मान्य छूट लेल गेल अछि। सुझाव सादर आमंत्रित अछि।