गजल

लडकीकेँ जाईत नहि होईत छै
लडका अजाईत नहि होईत छै

आन्हर भऽ डुबल अछि जे प्रेममे
ओकरा दिनराईत नहि होईत छै

विवाह, जन्म, मृत्यु, छै देव लिखल
प्रेमक तऽ साईत नहि होईत छै

प्रेमक व्यवहारमे उँच निच की
कियो कोनो पाईत नहि होईत छै

हृदय उछलैछ कहियो आ कतौ
एकर कोनो माटि नहि होईत छै

गजल

प्रस्तुत अछि रोशन झाक गजल

आहाँकेँ दिल जँ धडकैया तऽ धडकय दियौ

आँहाँके आँखि जँ फडकैया तऽ फडकय दियौ

मिटा सकत ने हाथक रेखा मेंहदी कखनो

आँहाँके हाथ जँ थडकैया तऽ थडकय दियौ

भऽ जाईछ बेडी जे पाएरक नुपुरो कखनो

डेग आँहाँके जँ बहकैया तऽ बहकय दियौ

किया दबैछी आँहाँ मनक अरमान अपन

आगि मनके जँ भडकैया तऽ भडकय दियौ

आँहि लए आकुल व्याकुल ग्रीष्म रोशन मन

दुपट्टा तन सँ जँ लडकैया तऽ लडकय दियौ

गजल

धडकलै छाति राति, बहुत दिन बाद मिता
जरलैय दिया बाति, बहुत दिन बाद मिता

छलैया सुखल जडि जे परुका रौदीमे
फुल फुलैले साईद, बहुत दिन बाद मिता

आब पैर कहाँ धरती उरी आकाश जे हम
निशामे गेलियै माति, बहुत दिन बाद मिता

करै कोनो जोगार, तुही छैं आश हमर
देखहि कोनो साईत, बहुत दिन बाद मिता

देखिते ओकरा मुग्ध भेलै जे गृष्म रोशन
जुडिते गेलै पाँति, बहुत दिन बाद मिता