चलू प्रेमक नगर सजनी बसाबै छी
दुनू प्रीतक डगर मिलि कय सजाबै छी
रहे दुनियाक डर ई आब कनिको नहि
हियामे दीप नेहक ओ जगाबै छी
जखन कखनो गबै छै कोइली वनमे
मधुर बंसी अहीं संगे बजाबै छी
अलग कखनो कियो नहि कय सकत हमरा
करेजा खोलि सप्पत खा बताबै छी
मधुर गाइब गजल सुरमे हिया बोड़ल
सिनेहक छांवमे ‘मनु’केँ सुनाबै छी
(बहरे हजज, मात्राक्रम : 1222-1222-1222)
✍🏻 जगदानन्द झा ‘मनु’
सभसँ बड़का गजलगोहि वर भेटलै
राति दिन ओ चलाबैत हर भेटलै
सोचि गेलहुँ भरोसा जकर कय क हम
गाममे नहि कतौ ओ तँ घर भेटलै
सत्य बजबाक साहस किए नहि कतौ
हाकिमक आँखिमे आइ डर भेटलै
जीत लेलक सभक मोन ओ गाममे
देख ओकर हृदय भक्त बड़ भेटलै
‘मनु’ निभेनाइ नेहक कठिन अछि बुझल
काँट रोपल अपन पैर तर भेटलै
(बहरे मुतदारिक, मात्राक्रम : 212-212-212-212)
✍🏻 जगदानन्द झा ‘मनु’
छूलक जे मोनसँ ओ आखर कहि दिअ
आँखिसँ जे पीलौं ओ सागर कहि दिअ
निर्मोही दुनियामे सभ मतलबकेँ
धोखा जे देलक ओ पाथर कहि दिअ
मोनक कोठीमे छी जे दुख रखने
आजुक दिन ओ सभकेँ सादर कहि दिअ
नेहक रस छलकैए आँखिक रस्ता
प्रेमसँ भरि ओ सुंदर गागर कहि दिअ
प्रेमक आगिसँ जीया धड़कय लागल
कोमल मोनक ‘मनु’ ओ कातर कहि दिअ
(बहरे मीर, मात्राक्रम : 22-22-22-22-22)
✍🏻 जगदानन्द झा ‘मनु’
जीवनक मेटैत अन्हार बाबूजी
छथि हमर भाग्यक सगर द्वार बाबूजी
छोड़ि सुख काटैत ओ राति-दिन दुख छथि
प्रेम परिवारक तँ आधार बाबूजी
केहनो संकट अबै ठाढ़ सोझाँ ओ
छथि घरक अनमोल रखवार बाबूजी
आँखिमे आशीष लेने हियामे डर
छी अहीं बच्चाक संसार बाबूजी
हारि कखनो जीवनक खेल ‘मनु’ गेलै
सामने मुस्कैत पतवार बाबूजी
(बहरे कलीब, मात्राक्रम : 2122-2122-1222)
✍🏻 जगदानन्द झा ‘मनु’
साधु छै चोर ई मिल कहै चोर सभ
झूठकेँ सत्य एतय रटै चोर सभ
देखि उन्नति लगातार सगरो सभक
भीतरहि डाहमे जड़ि मरै चोर सभ
लूटि कय गाम आ देश जे गेल खा
मंच पर आबि नेता बनै चोर सभ
राति दिन खैट शोणित गरीबक बहै
आइ चैनसँ महलमे रहै चोर सभ
घोर कयने कते पाप संसारमे
आब ‘मनु’ न्याय डंडसँ डरै चोर सभ
(बहरे मुतदारिक, मात्राक्रम : 212-212-212-212)
✍🏻 जगदानन्द झा ‘मनु’
आजुक जीवनमे नहि नेहक मोल
बिन वर्षा नहि कनिको मेहक मोल
काका मामा भैया सभ धन केर
पाइक आगू नहि छै देहक मोल
आन्हर की बुझतै फूलक सौंदर्य
लेहरु नजरिसँ जेना लेहक मोल
नश्वर ई काया हेतै माटीक
ककरो नहि जनतब छै खेहक मोल
जगमे रहते सभ दिन कपटी लोक
भेटत कखनो नहि ‘मनु’ छेहक मोल
(बहरे विदेह, मात्राक्रम : 22-22-22-22-21)
· मेह - माने मेघ/बादल या वर्षा, मेह केर दोसर अर्थ दाउन करै लेल गाड़ल गेल खूट्टा, जकर चारू कात बरद घुमै छै।
· लेहरु – लहैर, अत्यधिक गर्म प्रदेशमे रहै बला, दोसर अर्थ नेहरु, गाम घरमे कतेक ठाम नेहरुक उच्चारण लेहरु कयल जाइत अछि।
· लेह - लेह-लद्दाख/ अत्यधिक ठंढा प्रदेश
· खेह - माने धूल, गर्दा वा छाउर
· छेह - माने अंत, सीमा, वा दुखक पराकाष्ठा।
✍🏻 जगदानन्द झा ‘मनु’
रूसल पियाकेँ मनेबै कोना क हम
अपनो हियाकेँ दखेबै कोना क हम
नयनासँ धारा कते नोरक बहिरहल
मोनक विरहकेँ नुकेबै कोना क हम
छी आँखिमे आस बहुते रखने सजल
नेहक डगरकेँ बिछेबै कोना क हम
प्रेमक सबक ओ बिसरिए गेलाह सभ
विधि प्रेम हुनका सिखेबै कोना क हम
भोरक किरण बनि अएलहुँ यौ ‘मनु’ हमर
सुख आब नेहक नुकेबै कोना क हम
(बहरे सगीर मात्राक्रम : 2212-2122-2212)
✍🏻 जगदानन्द झा ‘मनु’
