चान सन शीतल रूप केहन अहाँकेँ
अप्सरा स्वर्गक होइ तेहन अहाँकेँ
अछि हृदयमे मूरत अहाँ केर सोभित
मोहि लेलक ई रूप एहन अहाँकेँ
देखिते आनंदसँ हिया भेल हर्षित
मंद शीतल मुस्कान जेहन अहाँकेँ
अपन आँखिक काजर बना राखि लिअ ने
प्राण हम्मर अछि आब रेहन अहाँकेँ
मोटरी दिअ माथक अपन आब सगरो
‘मनु’ तँ सबटा लय लेत गेहन अहाँकेँ
(बहरे खफीक, मात्राक्रम : 2122-2212-2122)
✍🏻 जगदानन्द झा ‘मनु’
हाथमे हाथ लेने सगरो चलब हम
आब तोहर बिना पल भरि नहि जियब हम
हो सुखद की कतेको अन्हार जीबन
बनि क छाहैर तोहर संगहि रहब हम
दीप नेहक मिझेए नहि आब कखनो
बनि क बाती सिनेहे हरदम जरब हम
अछि हँसी ई सरस निश्छल बड्ड मोहक
नेह भरि-भरि करेजा तोहर गहब हम
छोड़ि दुनिया कतौ नहि ‘मनु’ आब जायब
आँखिकेँ तोर सोझाँ एतहि मरब हम
(बहरे असम, मात्राक्रम : 2122-1222-2122)
✍🏻 जगदानन्द झा ‘मनु’
अहाँ सादा कागद परक पहिल कोनो आखर छी
हिया जकरा चिन्है हमर पहिल नेहक सागर छी
नयनमे छी सदिखन अहाँ विष्णु ब्रह्मा शिव बनि कय
सहारा जीवनकेँ हमर अहीं मोनक आदर छी
दुखक भारसँ जीवन हमर जखन टूटय लागैए
सिनेहक जे छाहरि दिए दुलारक ओ आँचर छी
सगर दुनिया हँसि देखलक हमर खाली जेबी टा
हिया बुझलक जे देखि कय अहीं मोनक गागर छी
चरण छू कय भेटय जकर सगर तीर्थक फल 'मनु'केँ
अहाँ मैया ममतामयी हमर भागक आगर छी
(मात्राक्रम : 1222-2212-1222-222 सभ पाँतिमे)
✍🏻 जगदानन्द झा ‘मनु’
गगन नेहक बना बदरा मधुर बरखा बहाबै अछि
पिया धरतीक आँचरमे अमृत रस ई चुआबै अछि
सजल नैना अहाँकेँ ई धनुष सन देखि कजरायल
हमर ओझल हियामे ओ बिलोका बड़ खसाबै अछि
जखन बाजल झनक पायल झमाझम भय कतहुँ बरसल
हुनक केशक हवा सगरो सुगंधित मन बनाबै अछि
मिलन कय आसमे बैसल तकै छी बाट प्रियतमकेँ
उमड़ि कय मेघ जे गरजै हियामे लौ जगाबै अछि
उमँग मोनक सगर संगे अपन नेने किए गेलहुँ
हमर ई प्राण ‘मनु’ लेने गजल विरही सुनाबै अछि
(बहरे हजज, मात्राक्रम : 1222-1222-1222-1222)
✍🏻 जगदानन्द झा ‘मनु’
जीवन भरि सबहक सुनिते रहलहुँ
मोनक सभ पीड़ा पिबिते रहलहुँ
गामक घर आँगन खाली कय हम
शहरक धूवाँमे जिबिते रहलहुँ
पोखरि भरि बाड़ीसँ मिला लयने
बिन माछक थारी तकिते रहलहुँ
सभकेँ सभ किछु नहि भेटल जगमे
भागक लिखलाहा गणिते रहलहुँ
मुँह बोने कौआ सगरो बैसल
चुप भय ‘मनु’ सभटा सहिते रहलहुँ
(बहरे मीर, मात्राकर्म : 22-2-22-22-22, तेसर शेरकेँ पहिल पाँतिमे दूटा अलग-अलग लघुकेँ दिर्घ मानक छूट लेल गेल अछि।)
✍🏻 जगदानन्द झा ‘मनु’
पैघ नहि जीवनसँ दोसर सजा कोनो
नहि कतौ अछि एहि दर्दक दवा कोनो
बंद केने मोनमे छी दुखक सागर
केकरो लागल भनक नहि हवा कोनो
सत्य अंतिम मृत्यु अछि जीवनक सबहक
बेसि एहिसँ आन अछि नहि मजा कोनो
बेइमानी आ कपटकेँ जतय घर नहि
अछि अहाँ लग एहि जगमे पता कोनो
‘मनु’ हियक भीतर अहंकार जे मारय
नहि कतो एहेन भेटल गदा कोनो
(बहरे कलीब, मात्राक्रम : 2122-2122-1222)
✍🏻 जगदानन्द झा ‘मनु’
हुनक मुस्कीक जादू जान मारैए
नजरि खसिते हियामे बाण मारैए
चमक घोघेसँ रूपक पूर्णिमा लेने
सगर अँगना कते मुस्कान मारैए
उदासी मोनमे कखनो जँ पसरैए
अहीं लग आबि ई फुलपान मारैए
सँभाइर पैर धरतीपर कनी राखू
झनक पायलसँ ई सुर तान मारैए
‘मनु’क सगरो गजलमे बनि अहीं आखर
कते यौवन दमकि सोहान मारैए
(बहरे हजज, मात्राक्रम : 1222-1222-1222)
✍🏻 जगदानन्द झा ‘मनु’
प्रेममे सदिखन किए हमहीं हारलौं
भागमे सभटा लिखल तोरा बारलौं
चैन मोनक आब भेटत कोना कतय
मोनमे खा चोट चित अप्पन मारलौं
राति-दिन आँखिसँ बहै नेहक जल सतत
आगिमे तोहर विरहकेँ घी ढारलौं
आब दुनियामे रहब नहि तोरा बिना
देख ली हम एक छन तेँ यम टारलौं
‘मनु’ जियाबै लेल तोहर हिय प्रेमकेँ
खून देहक हम अपन सभटा गारलौं
(बहरे जदीद, मात्राक्रम : 2122-2122-2212)
✍🏻 जगदानन्द झा ‘मनु’
