जीवनक मेटैत अन्हार बाबूजी
छथि हमर भाग्यक सगर द्वार बाबूजी
छोड़ि सुख काटैत ओ राति-दिन दुख छथि
प्रेम परिवारक तँ आधार बाबूजी
आबए संकट लड़ै ठाढ़ सोझाँ छथि
छथि घरक अनमोल रखवार बाबूजी
आँखिमे आशीष लेने हियामे डर
छी अहीं बच्चाक संसार बाबूजी
हारि कखनो जीवनक खेल ‘मनु’ गेलै
सामने मुस्कैत पतवार बाबूजी
(बहरे कलीब, मात्राक्रम : 2122-2122-1222)
✍🏻 जगदानन्द झा ‘मनु’
साधु छै चोर ई मिल कहै चोर सभ
झूठकेँ सत्य एतय रटै चोर सभ
देखि उन्नति लगातार सगरो सभक
भीतरहि डाहमे जड़ि मरै चोर सभ
लूटि कय गाम आ देश जे गेल खा
मंच पर आबि नेता बनै चोर सभ
राति दिन खैट शोणित गरीबक बहै
आइ चैनसँ महलमे रहै चोर सभ
पाप कयने अपन एहि संसारमे
आब ‘मनु’ न्याय डंडसँ डरै चोर सभ
(बहरे मुतदारिक, मात्राक्रम : 212-212-212-212)
✍🏻 जगदानन्द झा ‘मनु’
आजुक जीवनमे नहि नेहक मोल
बिन वर्षा नहि कनिको मेहक मोल
काका मामा भैया सभ धन केर
पाइक आगू नहि छै देहक मोल
आन्हर की बुझतै फूलक सौंदर्य
लेहरु नजरिसँ जेना लेहक मोल
नश्वर ई काया हेतै माटीक
ककरो नहि जनतब छै खेहक मोल
जगमे रहते सभ दिन कपटी लोक
भेटत कखनो नहि ‘मनु’ छेहक मोल
(बहरे विदेह, मात्राक्रम : 22-22-22-22-21)
· मेह - माने मेघ/बादल या वर्षा, मेह केर दोसर अर्थ दाउन करै लेल गाड़ल गेल खूट्टा, जकर चारू कात बरद घुमै छै।
· लेहरु – लहैर, अत्यधिक गर्म प्रदेशमे रहै बला, दोसर अर्थ नेहरु, गाम घरमे कतेक ठाम नेहरुक उच्चारण लेहरु कयल जाइत अछि।
· लेह - लेह-लद्दाख/ अत्यधिक ठंढा प्रदेश
· खेह - माने धूल, गर्दा वा छाउर
· छेह - माने अंत, सीमा, वा दुखक पराकाष्ठा।
✍🏻 जगदानन्द झा ‘मनु’
रूसल पियाकेँ मनेबै कोना क हम
अपनो हियाकेँ दखेबै कोना क हम
नैनासँ धारा कते नोरक बहिरहल
मोनक विरहकेँ नुकेबै कोना क हम
छी आँखिमे आस बहुते रखने सजल
नेहक डगरकेँ बिछेबै कोना क हम
प्रेमक सबक ओ बिसरिए गेलाह सभ
विधि प्रेम हुनका सिखेबै कोना क हम
भोरक किरण बनि अएलहुँ यौ ‘मनु’ हमर
सुख आब नेहक नुकेबै कोना क हम
(बहरे सगीर मात्राक्रम : 2212-2122-2212)
✍🏻 जगदानन्द झा ‘मनु’
हँसू यौ पिया मोनकेँ नहि दुखाबू
अपन एहि दासीसँ नैना लगाबू
अहाँ बिनु विकल भेल छी राति-दिन हम
पिया यौ हमर ई जियाकेँ जुड़ाबू
सजौने कते छी अहाँ प्रीत मोनक
कनी आबि नेहक तँ दरशन कराबू
अहाँ बिनु अपन देह बैरी बनल अछि
उठू यौ पिया आब हमरो उठाबू
विरहमे मरण सन भ जीबैत ‘मनु’ अछि
पियाजी मिलनके गजल नव सुनाबू
(बहरे मुतकारिब, मात्राक्रम : 122-122-122-122)
✍🏻 जगदानन्द झा ‘मनु’
हँसै छथि ओ हिया छनमे तोरि हम्मर
सिनेहक डोर गेली ओ छोरि हम्मर
भ गेने दूर आँखिसँ की नेह बिसरब
किए ओ गेलखिन मुखड़ा मोरि हम्मर
लगा कय आस बैसल छी मोन मारल
कनी नहि सोचलनि जियरा कोरि हम्मर
उमड़ि आँखिसँ बसोधारा नोर बहलै
भिजल अछि भाग कोना ई बोरि हम्मर
सिनेहसँ आब बहुते अछि डरि रहल ‘मनु’
सगर अपने हिया कयलक चोरि हम्मर
(बहरे करीब, मात्राक्रम: 1222-1222-2122)
✍🏻 जगदानन्द झा ‘मनु’
