गजल

चाकर  एक  बेर  राखि  क'  देखू  सभटा  अहाँकेँ टहल करब

पीसब भाँग नित्य आबि क' जे जे कहबै प्रभू हम कहल करब

डरबै  भूत नै  पिसाच  सँ  कहियो  सेवा  सदति  होइते   रहत

रहबै  घर  त'  घर म' सदिखन आ बाहरमे मशानो रहल करब

नंदी   केर   ध्यान  हम  रखबै  भगतै  दौड़िकेँ  जा  क'  रोमबै

दोसर  ठाम  नै  कतौ  हम  जेबै  भरि जीवने हम बहल करब

पूजा  केर  ओरियान  क'  नित्तहुँ देखब तखन और काज हम

नव नव फूल ताकि हेरि क' छोड़ब नै हम चरणमे गहल करब 

मालिक  एतबी  दया  करियौ  ने हे नोकरी पर म' राखि लिअ

कतबो काज माँथ पर रहतै नामे जापि सभ दुख सहल करब 

                                  

मात्राक्रम अछि २२२१-२१२१-१२२२-२१२२-१२१२

अभिलाष ठाकुर

गजल

 गजल

भूख  की   की   नै  करा  दै  छै

सुस्तके   कोसो  चला   दै    छै

भाग्य रहितो कर्म बिनु किछु नै

बात   ई   गीता   बुझा   दै   छै

पीब'   खातिर   छै   शराबे   नै

आँखिए   हुनकर  मता   दै  छै

साधिजे   संकल्प    रखने   छै

दृष्टिए   ओकर   बता    दै   छै

कालके  आगू   चलल  ककरा

केहनो   गरदनि  झुका  दै   छै

           ✍️ अभिलाष ठाकुर

मात्राक्रम अछि 2122-212-22

सभ पाँतिमे! सुझाव आमंत्रित अछि 💐

गजल

 गजल

समय पुरनो घाव जगा दैत छै बेर बेर

अपन छै वा आन बता दैत छै बेर बेर

हजारो बेरक दुखके जे रखै नै हिसाब

चुरुक भरि उपकार गना दैत छै बेर बेर

प्रयासे छै जीवनमे लक्ष्यकेँ प्राप्ति द्वार

समस्या ओ जड़ि सँ हटा दैत छै बेर बेर

शराबी छै से कहि बदनाम छै कैक ठाम

गरीबी  जमि   केर  टगा  दैत छै बेर बेर

कते आ ककरा रहलै धन कहू ने जमैल

पढू  ने  इतिहास  बता  दैत  छै  बेर बेर

            ✍️ अभिलाष ठाकुर

मात्राक्रम अछि 1222-2112-212-2121

सभ पाँतिमे! सुझाव आमंत्रित अछि 💐

गजल

गाम नै गाम शहर भेल जाइ छै

माय नै माय मदर भेल जाइ छै

केहनो छै कनियाँ नीक छै बहुत

बोल पप्पा क जहर भेल जाइ छै

भोट देबै ल' क' टाका यदा कदा

तैं न सरकार निडर भेल जाइ छै

छै अबैया हुनकर दुख कही कते

खूब बैमान पहर भेल जाइ छै

काफिया सँग म' रहने रदीफकेँ

जीवनक डोर बहर भेल जाइ छै

मात्राक्रम अछि 2122-1122-1212

गजल

लुटाबी कते

बचाबी कते

बहुत गप्प छै

सुनाबी कते

नयन जे कहै

नुकाबी कते

करेजा अपन

दुखाबी कते

बचै नै तखन

कमाबी कते

हुनक यादमे

बहाबी कते

122-12

गजल

कर्मक चक्का रूकए नै

आशक पैडिल टूटए नै

सत्यक पथमे कष्ट रहतै

हिम्मत कखनो छूटए नै

जीवक हत्या जे करै छथि

गरदनि माला शोभए नै

जकरा जत्ते भूख तहिना

तकरा कहियो पूरए नै

विद्या धन सन कोन धन छै

चोरो डाकू लूटए नै

(2222-2122)

गजल

के छै अप्पन के छै आन

कनियो नै अछि तक्कर भान

गलती नै छै झाँपै जोग

कसगर तखने पकड़ी कान

रहती घरमे लक्ष्मी खूब

कहियो कहियो करियौ दान

गरदनि निच्चा राखू थोड़

सभठां तैं भेटत सम्मान

पीबै छी जे जीवन नर्क

त्यागू जल्दी मदिरा पान

बहरे विदेह 22-22-22-21

गजल

तकियाक तूर सन दबाएल छी कतेको बेर

अप्पन अछैत हम बझाएल छी कतेको बेर

बूझैत सभ अकान छी देखि ई समाजक खेल

परतारि बाल सन ठकाएल छी कतेको बेर

जीवन बहुत नचेलकै नाच के करत प्रतिकार

पीलहुँ कहाँ मुदा झखाएल छी कतेको बेर

आयल विपति बनाक' रस्ता सहैत रहलौं खूब

उठबैत बोझ थड़-थड़ाएल छी कतेको बेर

ठोकर सिखा रहल कते डेग डेग पर अभिलाष

दुख केर आँचमे पकाएल छी कतेको बेर

२२१-२१२-१२२-१२१-२२२१ मात्राक्रम अछि सभ पाँतिमे

गजल

सूतल भाग्य जगा क' देखू

आलस नित्य हटा क' देखू

भेटत प्रेम अधिक अहाँके

निच्चा माँथ झुका क' देखू

सभटा काज भ जाइते छै

नमरी थोड़ धरा क' देखू

दुख कम हैत जरूर देखब

अपना बूझि सुना क' देखू

जीवैते म' मरै क' अछि की

प्रेमक रोग लगा क' देखू

222-112-122 सभ पाँतिमे, सुझाव आमंत्रित अछि 💐

गजल

हमरा लेल करेजा धड़कैत हेतौ तोरो

अदहा रातिक' सपना जगबैत हेतौ तोरो

उड़लै नींद हमर जहिये छोड़ि तों चलि गेलैं

कारी राति भयाबह डरबैत हेतौ तोरो

केना जीब रहल छी घुटि घुटि क' के देखत ई

ओना नोर त ठीके झहरैत हेतौ तोरो

तों मजबूर छलैं से कहि कात होइत गेलैं

हमरा सूनि दरदमे टहकैत हेतौ तोरो

तोहर याद रहत जाबे जीब सकबै अहि ठां

चिठ्ठी देल हमर मन पारैत हेतौ तोरो

मात्राक्रम अछि 2221-1222-2122-22,सभ पाँतिमे, सुझाव आमंत्रित अछि 💐

गजल

मुस्की अधर नुकाबी कत्ते

छुच्छे नयन लड़ाबी कत्ते

सहलौं बहुत कियो नै मानै

गरदनि कहू झुकाबी कत्ते

मोजर रहल कतौ नै हम्मर

दुखड़ा अपन सुनाबी कत्ते

किछु नै रहत जमा पूँजी तैं

नोरे तखन खसाबी कत्ते

कहलौं मुदा अहाँ नै एलौं

डिबिया कहू जराबी कत्ते

मात्राक्रम अछि 221-212-222 सभ पाँतिमे सुझाव आमंत्रित अछि 💐

गजल

अहाँ बिना सिन्दुर पिठार की हेतै

अहाँ बिना पावनि तिहार की हेतै

अहीं हमर छी देवता अहीं स्वामी

अहाँ बिना जीवन सकार की हेतै

भरोस नै अछि जे कखन अहाँ आयब

अहाँ बिना बिन्दी कपाड़ की हेतै

कते करी असगर पुजाक तैयारी

अहाँ बिना सौंसे हकार की हेतै

बहुत फरल अछि आम आउ ने गामे

अहाँ बिना फारा अचार की हेतै

मात्राक्रम अछि 1212-2212-1222 मुफाइलुन-मुस्तफइलुन-मुफाईलुन