सोमवार, 29 जून 2020

गजल

करिते रहलै मारि बात
धरिते रहलै डारि पात

हुनकर हँसी चूड़ा दही
हुनकर तामस दूध भात

एक दू तीन चारि पाँच
केने छै अनेको घात

कनी सुगंध कनी अवाज
पसरि गेलै चारू कात

बिच्चे बैसल धनी मनी
बाँकी सभ तँ काते कात

सभ पाँतिमे 22-22-22-2  मात्राक्रम अछि। दू अलग-अलग लघुकेँ दीर्घ मानबाक छूट लेल गेल अछि। सुझाव सादर आमंत्रित अछि।

बुधवार, 24 जून 2020

गजल

बाहर बाहर जोड़ल भतार
भितरे भीतर टूटल भतार

छै मृगतृष्णा सन के विकास
इम्हर उम्हर दौड़ल भतार 

इच्छा माने पूरा समान 
किम्हर जेतै परिकल भतार

लेने हेतै सभटा हिसाब
चुप्पे रहि रहि कानल भतार

हमरा आने देलक समाद
अपने लोकक दागल भतार

सभ पाँतिमे 22-22-22-121 मात्राक्रम अछि। सुझाव सादर आमंत्रित अछि।


सोमवार, 22 जून 2020

गजल

पानि कादो थाल की छै
बोनि उपजा टाल की छै

प्रश्न ईहो पूछि देलक
आर कहियौ हाल की छै

साधि लेलक दर्द सभटा 
राग सुर आ  ताल की छै

घीचि लेतै प्राण सभहक
जीह की छै खाल की छै

गेल सौतिन फेर पोखरि
माछ पुछतै जाल की छै


सभ पाँतिमे 2122-2122 मात्राक्रम अछि।

गुरुवार, 18 जून 2020

गजल

जनबल धनबल छलबल मोन
कत्ते सहतै निर्बल मोन

सदिखन चाहै पापक ओट
सुंदर निश्छल निर्मल मोन

गर्जन तर्जन वर्जन सूनि
चुप्पे रहलै कलबल मोन

हमरे हिस्सा थाकल देह
हमरे हिस्सा चनकल मोन

अनका खातिर अनचिन्हार
हमरा खातिर दगधल मोन

सभ पाँतिमे 22-22-22-21 मात्राक्रम अछि। सुझाव सादर आमंत्रित अछि।

सोमवार, 15 जून 2020

गजल

भूमिपर अघोषित आपदा छै
आदमीसँ बेसी देवता छै

मोक्ष लेल साधल मोहमाया
साधनासँ बेसी वासना छै 

मोन मरि कऽ एलै देह खातरि
जीबि जाइ अतबे कामना छै

रत्न सागरक मंथनसँ भेटल 
ई उठा पटक संभावना छै

मोनमे बसल छै मोन हुनकर
संग लेल ई प्रस्तावना छै 

सभ पाँतिमे 212-122-2122 मात्राक्रम अछि। सुझाव सादर आमंत्रित अछि।

शनिवार, 13 जून 2020

गजल

हरी नाम सुमिरन हरी नाम कीर्तन
हरी नाम पूजन हरी नाम वंदन

हरी नाम माथो हरी नाम चंदन
हरी नाम मूँहो हरी नाम दर्पण

हरी नाम बरतन हरी नाम भोजन
हरी नाम देहो हरी नाम पोषण

हरी नाम धरती हरी नाम मेघन 
हरी नाम गर्मी हरी नाम शीतन

हरी नाम  बाहर हरी नाम आँगन
हरी नाम दुनियाँ हरी नाम जनजन

सभ पाँतिमे 122-122-122-122 मात्राक्रम अछि। जनसाधारण लेल हरि केर उच्चारण हरी कएल गेल अछि। सभ भारतीय मानसमे सदासँ उपस्थित अछि हम एकरा मात्र गजलक हिसाबसँ रखलहुँ अछि। सुझाव सादर आमंत्रित अछि। 

शुक्रवार, 12 जून 2020

गजल

मनोबल मनोरम बना देत निश्चित
मनोकामना सभ पुरा देत निश्चित

नियम ई सदा मोन राखब अहाँ हम 
अपेक्षा उपेक्षित बना देत निश्चित

कते रोकि रखतै कते दाबि सकतै
बहल नोर दुनियाँ जरा देत निश्चित

कनी आचरण ठीक रखबै तँ अनुभव 
गजल नीक सुंदर कहा देत निश्चित

कियो आइ पूजा करैए मुदा ओ 
विसर्जन कऽ जल्दी भसा देत निश्चित

सभ पाँतिमे 122-122-122-122 मात्राक्रम अछि। सुझाव सादर आमंत्रित अछि। 

बुधवार, 10 जून 2020

गजल

पुछारी करा गेल हेतै
बुढ़ारी बना गेल हेतै

अचानक मिझा घूर भागल
जरूरे दगा गेल हेतै

कनी देखलहुँ बाट सरगक
दिबारी जरा गेल हेतै

अबैए गमक किछु अजीबे
कि सुइटर बुना गेल हेतै

विलंबित रहल ताल सभहक
कहीं द्रुत गबा गेल हेतै

सभ पाँतिमे 122-122-122 मात्राक्रम अछि। सुझाव सादर आमंत्रित अछि। 

मंगलवार, 9 जून 2020

गजल

सजल नयन मिथिलेश हो मालिक
कमल नयन अवधेश हो मालिक

हुनक कहब छनि जे ई सभ हमरे
हमर बचल कुन देश हो मालिक

दशा दिशा के तय करत अहि ठाँ
सड़ल गलल परिवेश हो मालिक

कनी मनी छनि आचरण हुनकर
बहुत बहुत उपदेश हो मालिक

नवे नवे अफसर नवे भाषण
सुनल सुनल संदेश हो मालिक

सभ पाँतिमे मात्राक्रम 12-1222-1222 अछि।  सुझाव सादर आमंत्रित अछि।

गजल

गतिहत संगत झंझट डेरा
मतिहत पंगत अगबे फेरा

अपने पुरखा कहने रहथिन
करनी जनिअह मरनी बेरा

एना मरतै आलू कोबी
ओना मरतै झिमनी घेरा

बहुते नखरा राँगल जंतुक
शेरक मुद्रा बैसल शेरा  

एकै पेटक तीनू बच्चा
सरदर तख्ता खुहरी चेरा

सभ पाँतिमे 22-22-22-22 मात्राक्रम अछि। सुझाव सादर आममत्रित अछि।

सोमवार, 8 जून 2020

गजल

घड़ी दू घड़ी जे बिता गेल भमरा
बहुत बात हमरा सिखा गेल भमरा 

गमक लीखि देबै मधुर रस परागो
जदी गाछ फूलक पटा गेल भमरा 

निमाहब कठिन छै हलाहल समाने
अपन आन खातिर बिका गेल भमरा 

हमर टीस लेलक अपन टीस देलक
तकर बाद किम्हर नुका गेल भमरा

रहै दाग पुरना मुदा दर्द नवके
हवन कुंड लग सकपका गेल भमरा 

सभ पाँतिमे 122-122-122-122 मात्राक्रम अछि। सुझाव सादर आमंत्रित अछि। 

शनिवार, 6 जून 2020

गजल

इष्ट सीता इष्ट राघव
इष्ट राधा इष्ट माधव

चैत वैशाखक युगल छवि 
अष्टमी छै मास भादव 

आस देलनि रास रचलनि
मुग्ध देवो मुग्ध मानव

नाम रावण नाम कंसे 
नष्ट केलनि दुष्ट दानव 

हित मनुष्यक चाहलथि ओ
एक रघुकुल एक यादव  

सभ पाँतिमे 2122-2122 मात्राक्रम अछि। सुझाव सादर आमंत्रित अछि।  

गजल

आइ जे इतिहास हेतै
काल्हि से उग्रास हेतै

पाइ बिन अतिचार मानू
पाइ बिन मलमास हेतै

की जरूरी हारि मानी
आस रखने रास हेतै

बूझि गेलहुँ बात हुनकर
दोसरे सभ खास हेतै

छल अभयमुद्रा बहुत दिन
आब ओ संत्रास हेतै

सभ पाँतिमे 2122-2122 मात्राक्रम अछि। सुझाव सादर आमंत्रित अछि।  

शुक्रवार, 5 जून 2020

गजल

अस्त्र हुनकर चालबाजी
शस्त्र हुनकर जालसाजी

डेग डेगक आस रखने
लोक खातिर वेद राजी

चुप भऽ देखै अंग दहिना
वाम खेलै तीख बाजी

सैंत बैसल छी हँसी हम
खूब उछलै नोर पाजी

खूब बंटाधार हेतै
खेल मुकुटक ताज ताजी

सभ पाँतिमे 2122-2122 मात्राक्रम अछि। सुझाव सादर आमंत्रित अछि। 

गुरुवार, 4 जून 2020

गजल

मोन बनलै शांतिवादी
पेट बनबै क्रांतिकारी

एक राजा एक रानी
बाद बाँकी दास दासी 

ई जमा हमरे जमा अछि
आँखि भारी पीठ भारी

की कऽ सकतै से तँ कहियौ
दोस्त बनलै काठ आरी

भाग ओकर एहने छै
एकभुक्ते एकचारी

सभ पाँतिमे 2122-2122 मात्राक्रम अछि। सुझाव सादर आमंत्रित अछि। 

बुधवार, 3 जून 2020

गजल

शत्रु सम अभ्यास ताकै
लाशमे उल्लास ताकै

बीचमे छै मोह माया
कातमे संन्यास ताकै

बेचलक जे माघ फागुन
घुरि कऽ ओ मधुमास ताकै

आर पारक खेल हेतै
नित नवल विश्वास ताकै

जानि ने की बूझि दुनियाँ
वास्तविक आभास ताकै

सभ पाँतिमे 2122-2122 मात्राक्रम अछि। सुझाव सादर आमंत्रित अछि। 

मंगलवार, 2 जून 2020

गजल

लंफ लंफा संगमे नै
ढेर शंका संगमे नै

आपरूपी इष्ट भेटल
धैर्य हमरा संगमे नै

ई उपासे ओ उपासे
पैंट अंगा संगमे नै

पाइ कोठा फ्रीज सोफा
बीत बिग्घा संगमे नै

काँट हँसलै देखि अतबे 
फूल भमरा संगमे नै
 
बोझ परहक आँटी सनक ई शेर--

देह पूरा ठीक लेकिन
रीढ़ हमरा संगमे नै

सभ पाँतिमे 2122-2122 मात्राक्रम अछि। सुझाव सादर आमंत्रित अछि। 

तोहर मतलब प्रेम प्रेमक मतलब जीवन आ जीवनक मतलब तों