गजल

हम बैसल छी रस्ता बना कऽ
ओ सुखमे अछि गलती गना कऽ

ए.सी पुछलक तेहन सवाल
चुप्पे रहलहुँ घामे नहा कऽ

खाली छै जेबी अंत काल
बुझलहुँ पूरा दुनियाँ कमा कऽ

फाइल बिहुँसै भरि बाट घाट
आ ई घूसो हँसलै भभा कऽ

अतबे गुण छै ओकर सदासँ
मारै पूरा दुनियाँ जिया कऽ

गुण बिन किछु नै छै रूप रंग
से देखल अपने के सजा कऽ

सभ पाँतिमे 22-22-22-121 मात्राक्रम अछि। ई बहरे लोचन अछि। सुझाव सादर आमंत्रित अछि।

गजल

लटकन झटकन सिंगार सोहावन
नव नौतारक संसार सोहावन

नै बँचतै कोनो शब्द वा साहस
सत्ता चाहै प्रतिकार सोहावन

खा रहलै दुखमे बोरि सुख सुविधा
बहुरुपिया के परचार सोहावन

आगूमे लाशक ढेर तइ बादो
सुनिते रहलै जैकार सोहावन

ओ सपना इच्छा बेचि लेने छै
बड़का बड़का पैकार सोहावन

सभ पाँतिमे 22-22-22-1222 मात्राक्रम अछि। सुझाव सादर आमंत्रित अछि।