गजल

होइत छैक बरखा आ रे बौआ
कागतक नाह बना रे बौआ

देखिहें घुसौ ने चोरबा घर मे
हाथ मे ठेंगा उठा रे बौआ

तोरे पर सभटा मान-गुमान
माएक मान बढ़ा रे बौआ

छैक गड़ल काँट घृणाक करेज मे
प्रेम सँ ओकरा हटा रे बौआ

नहि झुकौ माथ तोहर दुशमन लग
देशक लेल माथ कटा रे बौआ

गजल

कानए लागल पात नुका कए राति मे
खीजए लागल पात नुका कए राति मे

बेशर्मीक हद टपि गेल केओ ने कहलक
हूथए लागल पात नुका कए राति मे

नहि छैक पाइ जे कराओत इलाज दर्दक
कूथए लागल पात नुका कए राति मे

अपने सँ नजरिबंद हम रंग-महल मे
देखए लागल पात नुका कए राति मे

सुआद लगलैक खाली शोणित केर
चुसए लागल पात नुका कए राति मे

अनचिन्हार देह-दरसक रहस्य बूझल
छूबए लागल पात नुका कए राति मे

गजल

इजोत लेल अन्हेर नगरी जाइत लोक
सपना मे सपनाक भात खाइत लोक

खेत आब पटाओल जाइछ शोणित सँ
पानि महँक तेल जकाँ छताइत लोक

जकरा जतेक भेटैक सएह बड़ अगत्ती
खएलाक पछातिओ गुंगुआइत लोक

छोड़लकै डनियाँ तेहन ने अगिनबान
मोने मे पजरि मोने मे पझाइत लोक

बसातक कमी भए गेलैक गामो मे
आँक्सीजनक बोतल मे औनाइत लोक

गजल

मालक खातिर माल-जाल बनल लोक
देखाँउसक खातिर कंगाल बनल लोक


भूखक दर्द होइत छैक इजोतो सँ तेज
पेटक खातिर दलाल बनल लोक


वृत टूटल मिलल समानान्तर रेखा
बिनु कागजीक प्रकाल बनल लोक


सत्य-सत्य ने रहल ने रहल फूसि- फूसि
अपनेक लेल अपने जंजाल बनल लोक


सुस्जित आनन चानन ललाट
नुनिआएल देबाल बनल लोक

गजल

एहि रुपें सभ मे करार हेतैक
खाए लेल मनुखे जोगाड़ हेतैक


बनि गेल मीडिआ पोर्नोग्राफी
आब सए मे सए फिराड़ हेतैक


सेक्स, बलात्कार बढ़ि रहल अविराम
लोक मे बहिनोक ने विचार हेतैक


वयस सँ पहिनेहें बच्चा जवान
अर्पूणे पंचमे बर्खे रति-झमार हेतैक


चेतह अनचिन्हार कने बिलमि जाह
खने मे लोक बेसम्हार हेतैक

गजल

अहूँ पड़ाएल छलहुँ हमहूँ पड़ाएल छलहुँ
अहूँ घबड़ाएल छलहुँ हमहूँ घबड़ाएल छलहुँ


साइत एहने भेट लिखल छल कपार मे
अहूँ लजाएल छलहुँ हमहूँ लजाएल छलहुँ


रुकलाहा जिनगीक लेल सौरी बेर-बेर सौरी
अहूँ उबिआएल छलहुँ हमहूँ उबिआएल छलहुँ

शेर चल गेल आब ताल दए की हएत
अहूँ सुटिआएल छलहुँ हमहूँ सुटिआएल छलहुँ

रहि गेलहुँ अनचिन्हार करेज सटेलाक बादो
अहूँ अगुताएल छलहुँ हमहूँ अगुताएल छलहुँ

गजल

एना जे धड़ के नेड़ा बैसल छी
जिनगीक अर्थ के हेड़ा बैसल छी

नहि होइन्ह अन्हार हुनक कोबर मे
तँए अपन करेज जरा बैसल छी

उराहल इनारक पानि सँ कब्ज होइए
गंगोजल के सड़ा बैसल छी

भेटबे करत केओ ने केओ कहिओ
एही उम्मेद पर अपना के जिया बैसल छी

करोट फेरब के परिवर्तन कहल जाइए
जखन की आत्मे के सुता बैसल छी

गजल

बेमार छी मुदा बेमार नहि लगैत छी
दवाइ खाइ से कहिओ ने चाहैत छी

हमरा अहाँ नीक लगलहुँ सभ दिन सँ
मुदा प्रेम अछि से कहि नहि पबैत छी

विसर्जनक पछाति बला मूर्ति छी हम
भसा देल गेलहुँ मुदा नहि डुबैत छी

सभ दिन हमरा लेल मधुश्रावनिए थिक
टेमी दगेलाक पछातिओ नहि कुहरैत छी

गजल

जादू-मंतर मारि देलकै ओ जाइत-जाइत
मोन केकरो हरि लेलकै ओ जाइत-जाइत

जकरा अबिते भोर आबि गेलैक ठोर पर
आँखि मे साँझ आनि देलकै ओ जाइत-जाइत

हाथ जकर थरथराइत छलैक फूलो तोड़बा सँ
कोमल-करेज तोड़ि देलकै ओ जाइत-जाइत

उखरल छलैक सुलबाइ मुदा तैओ
आँकर-पाथर पचा लेलकै ओ जाइत-जाइत

अनचिन्हारक ठोर मे सटलै अनचिन्हारक ठोर
मुदा मुँह घुमा लेलकै ओ जाइत-जाइत

गजल

सटै जँ ठोर अनचिन्हारक अनचिन्हार सँ त बुझिऔ होली छैक
बाजए जँ केओ प्यार सँ त बुझिऔ होली छैक

बेसी टोइया-टापर देब नीक नहि भाइ सदिखन अनवरत
निकलि जाइ जँ अन्हार सँ त बुझिऔ होली छैक

केहन- केहन गर्मी मगज मे रहै छैक बंधु
मनुख बचि जाए जँ गुमार सँ त बुझिऔ होली छैक

की दुख होइत छैक चतुर्थीक राति मे नहि बुझि सकबै
हँसी जँ आबए कहार सँ त बुझिऔ होली छैक

जहाँ कनही गाएक भिन्न बथान तहाँ सुन्न- मसान
होइ कोनो काज सभहँक विचार सँ त बुझिऔ होली छैक

गजल

कीनल खुशी पर हसूँ कतेक
पलास्टिकक कंठ सँ बाजू कतेक

रहस्य बेपारक बुझबै नहुँ-नहुँ
देखू कमजोर हाथ मे तराजू कतेक

आधुनिको नहि उत्तर आधुनिक जुग
बच्चा बेचैत मनुख गर्जू कतेक

बिनु आँकरक भात कतए भेटत
कहू कओरे-कओरे थुकरु कतेक

अनचिन्हारक चश्मा लागल आखिँ पर
कहू दोसर लग हम बैसू कतेक

गजल

मोन मे बैसल मात्र एकटा साँप

बाहर सह-सह करैत कएकटा साँप

लगबैत रहलहुँ वएट आ सूचना तंत्र

बढ़ैत रहल महँगी आपदा साँप

बिकनीक डिजाइन छैक वा सुन्दरीक अपने

छाती मे लेपटाएल तगमा साँप

बुझाएत नहि रहत पाते मे मिझराएल

एनाहित डसँत सुगबा साँप

गजल

के कनैत अछि एहिठाम हमरा लेल

के रहैत अछि एहिठाम हमरा लेल

केकरो सपना मे अएबैक हम भ्रम नहि पोसब

के सुतैत अछि एहिठाम हमरा लेल

उठनाइ खराप नहि मुदा कनेक अहूँ सोचिऔ

के उठैत अछि एहिठाम हमरा लेल

अनवरत बसातक संग आबि रहल गर्दा

के उड़ैत अछि एहिठाम हमरा लेल

अनचिन्हार नाम अनचिन्हार गाम अनचिन्हार सभ

के गबैत अछि एहिठाम हमरा लेल

गजल

मोन कतबो मरलिअइ मोन रहि गेलैक मुदा

छवि कतबो हटेलिअइ आँखि मे बसि गेलैक मुदा

हाँड़-पाँजड़ रहए ने थिर चित्त चंचल

नोरक धार सँ आँखि दहि गेलैक मुदा

बैसल छी घर मे एकसरे एखन

कान मे केओ किछु कहि गेलैक मुदा

एक त विख्ख ताहू मे इ प्रेमक विख्ख

रोकिते-रोकिते चढ़ि गेलैक मुदा

मुँह जे देखिऐक त लगैक अनचिन्हारे सन

की करु प्रेम सँ करेज मथि गेलैक मुदा

गजल

एहि तरहें प्रेम लेल तरसल हमर करेज

बरखाक हद तोड़ि बरसल हमर करेज

नहि देखाएत ओकर नाम सच मानू

अछि बड्ड हाथक दकचल हमर करेज

नहि भेटतैक हमर प्रेमक गोपी केकरो

माघ मासक गाछी जकाँ उजरल हमर करेज

कनेक अहूँ खाउ कनेक अहूँ खाउ

भोजक अन्न जकाँ परसल हमर करेज

कतबो रोकबै नहिए रुकत औ सरकार

अनचिन्हारक संग उड़रल हमर करेज

गजल

किछु दूर चलब हमहूँ जँ संग दए सकी

रंगि देब हम सभ के जँ रंग दए सकी

अन्हारो मे चलब बिनु ठोकर खएने

चलबाक जँ कनिको ड़ंग दए सकी

कहबै जँ चार पर चड़बै पहाड़ पर

किछुओ ने असंभव जँ उमंग दए सकी

कोने-कोन मे बैसल कतेको राम

मारल जाएत रावण जँ धनुष भंग दए सकी

गजल

हमर ठोर पर बस अहिंक नाम

चारू पहर बस अहिंक नाम

लोक मरैए अहाँक रूप देखि

सुन्दरताक जहर बस अहिंक नाम

किछु नहि बचल हमरा लग

तएँ सगरो उमर बस अहिंक नाम

नीक लगैए इ दुखक गाम हमरा

सुखक नगर बस अहिंक नाम

मोनक उत्फाल करेजक बिहाड़ि

आँखिक भमर बस अहिंक नाम

गजल

अपने सँ आगि लगबैत छी आ मिझबैत छी

अपने सँ पीबि कए खसैत छी आ सम्हरैत छी

आँखि मे पड़ल नोरक धन लकथक देखू

अपने जमा करैत छी आ लुटबैत छी

शांत पूर्णिमाक राति मे अशांत करेज हमर

अपने सँ हकार दैत छी आ नोंत पुड़ैत छी

एहि टूटल करेज के एक बेर फेर टुटबाक इच्छा

अपने सँ करेज तोड़ैत छी आ कुहरैत छी

के बूझत हमर दुख आ दर्द एहि ठाम

अपने सँ चिन्हार होइत अनचिन्हार रहैत छी

गजल

बटोही केहन छैक बाट पर चलि कए देखिऔ

पिआसलक पिआस घाट पर चलि कए देखिऔ

घर मे घोंघाउज केने कोनो लाभ नहि

सस्ती मँहग हाट पर चली कए देखिऔ

कमजोर वस्तुक मर्म ओना नहि बुझाएत

दिबाड़ लागल टाट पर चलि कए देखिऔ

कोना बुझबै कुसिआर आ सिठ्ठी के संबंध

कने कोल्हुआरक राट पर चली कए देखिऔ

नहि रहत कनबो मोल अहाँक गुण केर

बिनु पैंकिग हाट पर चलि कए देखिऔ

गजल

आरो बनतै कतेक बहन्ना देखबाक चाही

जनताक बनतै कतेक सन्ना देखबाक चाही

भात-दालि कात भेल नून-सोहारी पर आफद

फटकी कतेक सपनाक चन्ना देखबाक चाही

थपड़ी त अदौ सँ बजिते आएल अछि

लुटतै के कतेक टन्ना देखबाक चाही

घरक बोझ छिड़िआ रहल एम्हर सँ ओम्हर

कोम्हर हेड़ा गेल जुन्ना देखबाक चाही

खेतो के पता नहि कि भए गेलैक अछि

खादो देलाक पछाति मरहन्ना देखबाक चाही