गजल

जकरा केलहुँ अपना बुझि
से सभ भागल अनका बुझि

हमरा गेने घाटा छनि
नहिए गेलहुँ दुविधा बुझि

बजने हेतै किछु ने किछु
चुप्पे रहलै खतरा बुझि

असगर रहलहुँ आँगनमे
लोको देखै मजमा बुझि

हेता ओ साँचक मुरती
जनता पहुँचल चमचा बुझि

सभ पाँतिमे 22-22-22-2 मात्राक्रम अछि। ई बहरे मीर अछि। सुझाव सादर आमंत्रित अछि।

रुबाइ

मुँह पर दरद आबि जेए ओ मरद नै

हर बहैत जे  बसि जेए ओ बरद नै 

जिम्मेदारी घरक ल गेल विदेशमे 

‘मनु’ केना बुझलक जेए ओ दरद नै

✍🏻 जगदानन्द झा ‘मनु’