गजल

दर्दके सेहो ई दर्द दर्दनाक बुझाइ छै
लोक छै किछु जकरा लेल सब मजाक बुझाइ छै

एक छनमे बन्हन तोड़ि गेल बात बनाक ओ
आब नाता हमरो सूतरीक टाक बुझाइ छै

सोझके दुनियामे के पुछै समाज जहर बनल
नैन्ह टा बच्चा आ बूढ़ सब चलाक बुझाइ छै

धुंइया जोरक उठलै पड़ोसियाक दलानमे
रचयिता एहन षड्यंत्र केर पाक बुझाइ छै

मोंछ पर तेजी ओकीलबा घुमाक दएत छै
कचहरीके मुद्दामे बढल तलाक बुझाइ छै

2122-2221-2121-1212

© कुन्दन कुमार कर्ण

www.kundanghazal.com

नात

मिनट घंटा दिन महीना
रटलहुँ मदीना मदीना

दुनियाँमे मक्का भेलै
माथक नगीना नगीना

एथिन फेरो मोहम्मद
हुसैन सकीना सकीना

मेह्शर केर धारमे छै
काबा सफीना सफीना

देखत कोना मौलाकेँ
जे छै नबीना नबीना

सभ पाँतिमे 222-222-2 मात्राक्रम अछि। दू टा अलग-अलग लघुकेँ दीर्घ मानबाक छूट लेल गेल अछि। मूल शब्द छै ना-बीना मने "आन्हर" मुदा मैथिली उच्चारण हिसाबसँ एकरा "नबीना" लिखल गेल अछि। मैथिलीक उच्चारण हिसाबसँ नुक्ताक प्रयोग नै भेल अछि। सुझाव सादर आमंत्रित अछि।

गजल

आब अप्पन आसन लेल
टाट चाही आँगन लेल

सत्य ईहो छै रे भाइ
मृत्यु चाही जीवन लेल

नेह चाही अपने हमरा
टीस चाही साजन लेल

राज्य नै चलतै हुनकासँ
नेत चाही शासन लेल

भोग चाहथि साधू संत
जोग चाही राजन लेल

सभ पाँतिमे 2122 2221 मात्राक्रम अछि। तेसर शेरक पहिल पाँतिक अंतिम दीर्घकेँ लघु मानि लेबाक छूट लेल गेल अछि।

गजल

जुआनीके पहिल उत्सव मनेलौं हम
हियामे ओकरा जहिया बसेलौं हम

सुरुआते गजब छल सोलहम बरिसक
अचानक डेग यौवन दिस बढेलौं हम

उचंगाके कमी नै टोलमे कोनो
नजरि मिलिते इशारामे बजेलौं हम

गवाही चान तारा छै पहिल मिलनक
कलीके संग भमरा बनि फुलेलौं हम

असानी छै कहाँ टिकनाइ नेही बनि
समाजक रीतमे शोणित बहेलौं हम

कलम कापी किताबक कोन बेगरता
जखन इतिहासमे प्रेमी लिखेलौं हम

चिरै सन मोन ई उड़िते रहल कुन्दन
असम्भवपर किए असरा लगेलौं हम

बहरे-हजज (1222×3)

© कुन्दन कुमार कर्ण

www.kundanghazal.com

गजल

किछु काज भगवान भरोसे
किछु काज शैतान भरोसे

किछु लोक नोरेसँ भरल अछि
किछु लोक मुस्कान भरोसे

किछु आँखि सोनासँ सजल छै
किछु आँखि दुभिधान भरोसे

बहुते मजा आबि रहल छै
किछु बात अनुमान भरोसे

लाभक कथा के क' रहल अछि
किछु लाभ नुकसान भरोसे

सभ पाँतिमे 2212-21122 मत्राक्रम अछि। सुझाव सादर आमंत्रित अछि।

गजल

किछु बात भेलै किछु किछु
शुरुआत भेलै किछु किछु

जे देखलहुँ सपनामे
सच बात भेलै किछु किछु

अइ मोनपर सुंदर सन
आघात भेलै किछु किछु

किछु शांति रहलै फेरो
उत्पात भेलै किछु किछु

हुनकर कृपा दुनियाँमे
खैरात भेलै किछु किछु

सभ पाँतिमे 2212-222  मत्राक्रम अछि। सुझाव सादर आमंत्रित अछि।