Tuesday, 19 June 2018

गजल

जुआनीके पहिल उत्सव मनेलौं हम
हियामे ओकरा जहिया बसेलौं हम

सुरुआते गजब छल सोलहम बरिसक
अचानक डेग यौवन दिस बढेलौं हम

उचंगाके कमी नै टोलमे कोनो
नजरि मिलिते इशारामे बजेलौं हम

गवाही चान तारा छै पहिल मिलनक
कलीके संग भमरा बनि फुलेलौं हम

असानी छै कहाँ टिकनाइ नेही बनि
समाजक रीतमे शोणित बहेलौं हम

कलम कापी किताबक कोन बेगरता
जखन इतिहासमे प्रेमी लिखेलौं हम

चिरै सन मोन ई उड़िते रहल कुन्दन
असम्भवपर किए असरा लगेलौं हम

बहरे-हजज (1222×3)

© कुन्दन कुमार कर्ण

www.kundanghazal.com

No comments:

Post a Comment

तोहर मतलब प्रेम प्रेमक मतलब जीवन आ जीवनक मतलब तों