गजल

अजगुत जोड़ी हथियार सत्ता

तइपर फेरो सरकार सत्ता

सत्ते भीतर बुधियार सत्ता

अँगने आँगन बटमार सत्ता

देखाबै छै सुंदर हँसी आ

नुकाबै छै नोरक धार सत्ता

नतमस्तक भेलै पाइ आगू

दुखिया लग छै फुफकार सत्ता

कहुना जीबै ई देश दुनियाँ

अतबे केलक उपकार सत्ता

सभ पाँतिमे 22-22-2-2122 मात्राक्रम अछि। सुझाव सादर आमंत्रित अछि। 

गजल

घरहिमे उगल छै तरेगन

हृदयमे बसल छै तरेगन

विकासक कऽ अनघोल सौंसे

तुरंते घुरल छै तरेगन

अबारा हवा मेघ मौसम

अबारा बनल छै तरेगन

जहाँ धरि रहै चान सूरज

तहाँ धरि मरल छै तरेगन

हमर के हुनक के किनक के

अहीमे फँसल छै तरेगन

सभ पाँतिमे 122-122-122 मात्राक्रम अछि। सुझाव सादर आमंत्रित अछि।

गजल

विमर्शे जँ बेशर्म हो की कऽ सकबै

कि तर्के जँ बेशर्म हो की कऽ सकबै

सजा देब हम शब्दकेँ आवरणमे

ई अर्थे जँ बेशर्म हो की कऽ सकबै

गमा देल जीवन अही मर्म खातिर

से मर्मे जँ बेशर्म हो की कऽ सकबै

कुकर्मक हिसाबे किए लेब बहिना

सुकर्मे जँ बेशर्म हो की कऽ सकबै

किए श्राद्ध पचतै किए पानि रुचतै

ई कर्ते जँ बेशर्म हो की कऽ सकबै

सभ पाँतिमे 122-122-122-122 मात्राक्रम अछि। किछु शेरमे एक अक्षरीय दीर्घकेँ लघु मानि लेबाक छूट लेल गेल अछि। सुझाव सादर आमंत्रित अछि।