गजल

 

प्रेममे हुनकर जहर चिखने जाइ छी 

सब बुझैए  हम निशा केने जाइ छी

 

जे मजूरक पैँख  पेलौं उपहारमे

प्राण बुझि संगे सगर नेने जाइ छी

 

रोशनाई नै कलममे  बड़ अछि कहक

चीर छाती सोणितसँ लिखने जाइ छी

 

मानतै के देख मुँह पर मुस्की हमर

की करेजाकेँ अहाँ खुनने जाइ छी 

 

जीवनक ठोकर कते लागल चारुदिश

सुमरि ‘मनु’केँ चोट सब सहने जाइ छी

 

(बहरे जदीद, मात्राक्रम- 2122-2122-2212)

✍🏻 जगदानन्द झा ‘मनु’

 

उठलै करेजामे दरदिया हो राम - गजल

 

रुबाइ

हमहूँ खेत आइ बोटीकेँ रोपलौं

पोसै लेल पेट झूठक हर जोतलौं

कारी कोटसँ कोटमे निसाफ ककरा

टाका पाबि आँखि बान्हि दफा जोखलौं 

✍🏻 जगदानन्द झा ‘मनु’

रुबाइ

तोरा नहि हम छोड़लौं नहि हम बेवफा

तोरा बिन नहि मरलौं नहि हम बेवफा

तोहर प्राण गेल बुझि नहि जीवैत ‘मनु’

बिन काठीए जरलौं  नहि हम बेवफा

               ✍🏻 जगदानन्द झा ‘मनु’