गजल

अंगूर खट्टा लताम थुर्री जामुन लाल
गाछो मचा रहल बड़का बबाल

एखबारी विकास आ जनता उदास
बहिरा नाचए अपने ताल

पाँच बरिस पर सुरुज उगैए
बाँकी समय बदरी-बिकाल

लागल हाट अछि गमला के
फूल तकैए कादो-थाल

अनचिन्हार त अनचिन्हारे अछि
चिन्हार बनल अछि बड़का काल

गजल

अहाँ निरोध करु
अहाँ विरोध करु

लोक बढ़त आँगा
अहाँ अवरोध करु

धनी बनए धनी
एहने शोध करु

जनतंत्र अपने जन्मल
खूब ओध-बाध करु

खाएब अहाँ फास्ट-फूड
बरबाद बाध करु

गजल

मनुख पर भूकैत अछि कूकूर
खजाना के लुटैत अछि कुकूर

की मनु की आदम की थिक हौआ
नियम बना स्वयं तोड़ैत अछि कूकूर

लक्ष्य नहि बाटे-बाट पसरल
बेमतलब के दौड़ैत अछि कूकूर

आगि-पानि-बसात सभ बेकाजक
रंग-महल मे मौज उड़बैत अछि कूकूर

पदितो जाइ पड़ाइतो जाइ अनचिन्हार
एहिठाम कूकूरे के हबकैत अछि कूकूर

गजल

तबीयत ठीक रहत
जँ नीयत ठीक रहत

खल-खल हँसती धरती
जँ रैयत ठीक रहत

हेतैक नीक देशक
जँ जेठरैयत ठीक रहत

बुड़िबक बेटा टके काबिल
जँ किस्मत ठीक रहत

हेबे करतैक समाधान
जँ सिकाइत ठीक रहत

गजल

सोना भेटत सस्ता मँहग बड्ड चाउर देखब एक दिन
लोक एहिना लूटत हबाउर देखब एक दिन

अहाँ संग हमरा देखि सदिखन
लोक जरत आ बनत छाउर देखब एक दिन

विधान सभा लोक सभा शोक सभा
भूखल जनता दैत रहत धमाउर देखब एक दिन

हुनकर धोधिए देखि मेटा गेल भूख हमर
एहिना अँहू सभ करब चराउर देखब एक दिन

नोरक खिच्चरि दर्दक तिलबा कष्टक चुड़लाइ
एहिना हएत अनचिन्हार जड़ाउर देखब एक दिन