गजल

फूलक बनलै सहचर डारि
जतरा रहलै मजगर डारि

सुखिते मातर पहिलुक गाछ
झटपट ताकै हरियर डारि

किनको हिस्सा हल्लुक छैक
किनको हिस्सा भरिगर डारि

जे सभ धरतै जत्ते माटि
तत्ते ओक्कर नमहर डारि

इच्छा भीतर इच्छा बास
सभहँक जीवन रसगर डारि

पहिने धामन तकरा बाद
भेलै गहुमन अजगर डारि

सभ पाँतिमे 222-222-21 मात्राक्रम अछि। सुझाव सादर आमंत्रित अछि।

गजल

हमहूँ ओहो अमुक अमुक
सदिखन केलहुँ हुलुक बुलुक

पानि घटि गेल छै सौंसे

खूने पीबै चुरुक चुरुक

भूखक मारल सभहँक घर
हिंदू हिंदू तुरुक तुरुक

आँगन कानै लोकक बिन
घूमथि बाबा मुलुक मुलुक

जिनकर चालि चलन घटिया
संसद गेलथि ठुमुक ठुमुक

सभ पाँति 22-22-22-2 मात्राक्रम अछि। दू टा अलग अलग लघुकेँ दीर्घ मानबाक छूट लेल गेल अछि। मैथिलीमे "ठुमुकि" शब्द सही छै मुदा काफियाक रक्षा लेल ओकरा "ठुमुक" बना देल गेल अछि। सुझाव सादर आमंत्रित अछि।

गजल

कट्ठा बिग्घा धूरे धूर

सौंसे देखल भूरे भूर

अप्पन अप्पन मतलब लेल

दुनियाँ भेलै चूरम चूर

नेहक लागल बड़का रेस

हमहूँ दौड़ल पूरे पूर

चंदा तारा हुनके आगु

हमरा लागै दूरे दूर

रहलै आँगन कनियें देर

बाँकी केलक टूरे टूर

सभ पाँतिमे 22 22 22 21 मात्राक्रम अछि।