जेहन जेहन भेलै मति
तेहन तेहन भेलै गति
खाली सम्बन्धे टुटलै
जीवनमे छै अतबे क्षति
नै छै कियो जनता लेल
प्रधानमंत्री राष्ट्रोपति
कनियें रस आ बहुते बिख
रखने रहला हमरा प्रति
हम्मर हिनकर जिनकर हो
छै ईहो अति ओहो अति
सभ पाँतिमे 22-22-22-2 मात्राक्रम अछि। दू अलग-अलग लघुकेँ दीर्घ मानबाक छूट लेल गेल अछि। सुझाव सादर आमंत्रित अछि। ई बहरे मीर अछि।
हुनकर आँखिक अतबे सपना
हिंदू मुस्लिम चमरा बभना
साहित्य आ कि राजनीतिमे
अबिते रहलै अदना पदना
अधरतियामे हमहूँ देखल
एकै भेलै अरघा बदना
नोर नोर नोर नोरे नोर
अतबे लिखने रहथिन विधना
दुख भेटल रहै मुँहदेखाइ
दुक्खे रहै हमर मुँहबजना
सभ पाँतिमे 22-22-22-22 मात्राक्रम अछि। दू टा अलग-अलग लघुकेँ दीर्घ मानल गेल अछि। ई बहरे मीर अछि
छै अमीरक दिक्कत हीरा सोन दिक्कत
आ गरीबक दिक्कत माँड़े नोन दिक्कत
कोना पुरतै सिंदूर सभ इच्छा लेल
रहतै किछु इच्छा कुमारि तँ कोन दिक्कत
हमहूँ मानि लेलहुँ ओहो मानि लेलक
अइ दुनियाँमे देह दिक्कत मोन दिक्कत
किनको खातिर ई कर्जो भेलै तगमा
किनको खातिर सबूत बला लोन दिक्कत
बिना जनने बिना बुझने उल्टा प्रभाव छै
तांत्रिक सभ लग जोग दिक्कत टोन दिक्कत
सभ पाँतिमे 222-222-222-22 मात्राक्रम अछि। दू अलग-अलग लघुकेँ दीर्घ मानबाक छूट लेल गेल अछि। ई बहरे मीर अछि।
राति चुप अछि आ गगन के ओ चान चुप अछि
फेरि के आँगनसँ मुँह ई दलान चुप अछि
छोड़ि के चलि गेला जहियासँ सभके बाबा
माँछ-पोखरि, खेत-गाछी, मचान चुप अछि
बाजि के टप टप अहाँ पैघ नै भ' जायब
पैघ अछि ओ जे कि सागर समान चुप अछि
रूप हुनकर "मीर" के सब गजलसँ बढ़ि के
तँइ हमर सब शे'र बनि के अकान चुप अछि
फेर छी सबटा समयक ई आर किछु नै
शोर चुप्पी अछिक' रहल आ जुबान चुप अछि
~आशुतोष मिश्रा 'अज़ल'
मात्रा क्रम:-२१२२ २१२२ १२१ २२
हमर नाम आशुतोष मिश्रा 'अज़ल' भेल।हम एम.ए क रहल छी हिंदी साहित्यसँ।ननौर, मधुबनी(बिहार)के रहनिहार छी।
