गजल

फरेबक नियम मुँहजबानी बतेलक

मरबकेँ विकासक निशानी बतेलक

अपन खर्चकेँ मानि बैसल जरूरति

हमर खर्चकेँ ओ फुटानी बतेलक

जखन तर्क मँगलहुँ तकर बाद बुझलहुँ

अपौरुष कहीं आसमानी बतेलक

नरेटी दबेलक कियो आबि चुप्पे

कियो आबि चुप्पे कहानी बतेलक

कनी बात ठोकर सिखा गेल हमरा

कनी बात ई बुद्धिमानी बतेलक

सभ पाँतिमे 122-122-122-122 मात्राक्रम अछि आ ई बहरे मुतकारिब मुस्समन सालिम अछि। सुझाव सादर आमंत्रित अछि।

 

गजल

बात बाजै जोर चोट्टा

देश बेचै चोर चोट्टा

आँखिमे की छै गरीबक

बाँचि गेलै नोर चोट्टा

आस खेलक साँझ सभहक

खून पीतै भोर चोट्टा

एक गुड्डी छटपटेलै

तोड़ि देलक डोर चोट्टा

लोक मानै लोक जानै

लोक छै लतखोर चोट्टा

सभ पाँतिमे 2122-2122 मात्राक्रम (बहरे रमल मोरब्बा सालिम वा बहरे रमल सालिम चारि रुक्नी) अछि। सुझाव सादर आमंत्रित अछि। 

गजल

दुनियाँ बहुते क्रूर महोदय

सपना चकनाचूर महोदय

आनक नाँगरि देखि हँसू नै

देखू अपनो खूर महोदय

अपराधी ओ भूख अशिक्षा

सभटा अछि मंजूर महोदय

कोना जरलै गाम पता नै

चुप्पे रहलै घूर महोदय

सुविधा गेलै बाँस बरेली

कत्ते मूनब भूर महोदय

सभ पाँतिमे 22-22-21-122 मात्राक्रम अछि। सुझाव सादर आमंत्रित अछि।

गजल

जीवन बहुत रसदार छै

बस एकटा खौकार छै

निंदा परोसत बेर बेर

दुनियाँ बहुत दिलदार छै

मतलब निकालत मतलबी

मोनो हमर तैयार छै

छै भीखपर सेना मुदा

सुविधा सहित सरदार छै

किछु हाट आ किछु वस्तु छै

किछु लोक बस पैकार छै

सभ पाँतिमे 2212-2212 मात्राक्रम अछि। ई बहरे रजज मोरब्बा (दू) सालिम बहर अछि। दोसर शेरक पहिल पाँतिक अंतम लघु छूटक तौरपर अछि। सुझाव सादर आमंत्रित अछि।