जकर नै दालि गललै कड़ुआय छै ओ
समय संगे कतेको बौराय छै ओ
अखाड़ामे जखन जीतब कठिन रहलै
प्रपंचक बाट धेने हरषाय छै ओ
सभक सोझाँ कते हिम्मत देखबै छै
मुदा जनता हियामे घबराय छै ओ
पहीने छै लगै केहन नीक सभटा
जखन थापर पड़ै छै पछताय छै ओ
कपट कय जे बुझै छै बुझलक कियो नहि
‘मनु’क ई देख मुस्की अकुलाय छै ओ
(बहरे करीब, मात्राक्रम : 1222-1222-2122)
✍🏻 जगदानन्द झा ‘मनु’
चलि अहाँ संगे हमर जीवन ताड़ि दिअ
छी पियासल हम कनी अमरित ढारि दिअ
चारु दिस अन्हार पसरल अछि मोनमे
आबि दीया एकटा प्रीतक बारि दिअ
डेग डोलैए हमर नेहक आसमे
प्राण बनि देहक अहाँ जीवन धारि दिअ
मेघ धेने अछि सुखक आँगनमे किए
आ अपन मुसकीसँ ओ सभटा मारि दिअ
आर नहि हमरा तँ चाही किछु प्रेममे
बस अहाँ जीवन अपन ‘मनु’पर हारि दिअ
(बहरे जदीद, मात्राक्रम : 2122-2122-2212)
✍🏻 जगदानन्द झा ‘मनु’
