गजल

लुटाबी कते

बचाबी कते

बहुत गप्प छै

सुनाबी कते

नयन जे कहै

नुकाबी कते

करेजा अपन

दुखाबी कते

बचै नै तखन

कमाबी कते

हुनक यादमे

बहाबी कते

122-12

गजल

कर्मक चक्का रूकए नै

आशक पैडिल टूटए नै

सत्यक पथमे कष्ट रहतै

हिम्मत कखनो छूटए नै

जीवक हत्या जे करै छथि

गरदनि माला शोभए नै

जकरा जत्ते भूख तहिना

तकरा कहियो पूरए नै

विद्या धन सन कोन धन छै

चोरो डाकू लूटए नै

(2222-2122)

गजल

या तँ राखि ले अपना लग

या तँ आबि जो हमरा लग

साज बाज बहुते बजबै

भोर साँझ ओ बहिरा लग

किछु विकास खातिर हमहूँ

आबि गेल छी चिकबा लग

आरि खेतमे झगड़ा छै

पंच बनि कऽ छी हत्था लग

नेह छोड रखलक बहुते

फेर गेल ओ अनका लग

सभ पाँतिमे 212-122-22 मात्राक्रम अछि। सुझाव सादर आमंत्रित अछि।

गजल

के छै अप्पन के छै आन

कनियो नै अछि तक्कर भान

गलती नै छै झाँपै जोग

कसगर तखने पकड़ी कान

रहती घरमे लक्ष्मी खूब

कहियो कहियो करियौ दान

गरदनि निच्चा राखू थोड़

सभठां तैं भेटत सम्मान

पीबै छी जे जीवन नर्क

त्यागू जल्दी मदिरा पान

बहरे विदेह 22-22-22-21

गजल

तकियाक तूर सन दबाएल छी कतेको बेर

अप्पन अछैत हम बझाएल छी कतेको बेर

बूझैत सभ अकान छी देखि ई समाजक खेल

परतारि बाल सन ठकाएल छी कतेको बेर

जीवन बहुत नचेलकै नाच के करत प्रतिकार

पीलहुँ कहाँ मुदा झखाएल छी कतेको बेर

आयल विपति बनाक' रस्ता सहैत रहलौं खूब

उठबैत बोझ थड़-थड़ाएल छी कतेको बेर

ठोकर सिखा रहल कते डेग डेग पर अभिलाष

दुख केर आँचमे पकाएल छी कतेको बेर

२२१-२१२-१२२-१२१-२२२१ मात्राक्रम अछि सभ पाँतिमे

गजल

प्रश्न एलै गरीबक

पास भेलै विधायक

बेरपर तोड़ि दैए

चालि केहन बजारक

छै बहुत दाम एकर

नोर छी हम अमीरक

ओ गला देत कहियो

दालि छी हम दियादक

डूबि गेलै नशामे

नाम सत्ता अराजक

सभ पाँतिमे 2122-122 मात्राक्रम अछि। सुझाव सादर आमंत्रित अछि।

गजल

वचन सूनि बुझलहुँ देवता विशारद

करम देखि बुझलहुँ आपदा विशारद

जते जे सुनेलथि नीक मीठ बोली

कहीं ने कहीं छथि वेदना विशारद

बहुत बेर पुजलक पर्व लाकडाउन

मजा मारि रहलै साम्यता विशारद

कहीं देखि शायद धारणा बनल छै

कुकर्मेसँ जीबै चेतना विशारद

रहल दूर दूरे ज्ञान गुण करीबी रहल आस पासे सूचना विशारद

सभ पाँतिमे 122-122-212-122 मात्राक्रम अछि। सुझाव सादर आमंत्रित अछि। 

गजल

संस्था संस्था खेलब बहिना

सदिखन सभटा लूटब बहिना

दुखमे सुखमे की छै हालति

अपने सन से बूझब बहिना

अट्टा पट्टा कुर्सी सत्ता

कह ने की की राखब बहिना

असगर आँगन हमहूँ असगर

अपने लग की बाजब बहिना

ई नाटक छै बस नाटक छै

फाटल परदा घीचब बहिना

सभ पाँतिमे 22-22-22-22 मात्राक्रम अछि। ई बहरे मीर अछि।