गजल
भूख की की नै करा दै छै
सुस्तके कोसो चला दै छै
भाग्य रहितो कर्म बिनु किछु नै
बात ई गीता बुझा दै छै
पीब' खातिर छै शराबे नै
आँखिए हुनकर मता दै छै
साधिजे संकल्प रखने छै
दृष्टिए ओकर बता दै छै
कालके आगू चलल ककरा
केहनो गरदनि झुका दै छै
✍️ अभिलाष ठाकुर
मात्राक्रम अछि 2122-212-22
सभ पाँतिमे! सुझाव आमंत्रित अछि 💐
गजल
समय पुरनो घाव जगा दैत छै बेर बेर
अपन छै वा आन बता दैत छै बेर बेर
हजारो बेरक दुखके जे रखै नै हिसाब
चुरुक भरि उपकार गना दैत छै बेर बेर
प्रयासे छै जीवनमे लक्ष्यकेँ प्राप्ति द्वार
समस्या ओ जड़ि सँ हटा दैत छै बेर बेर
शराबी छै से कहि बदनाम छै कैक ठाम
गरीबी जमि केर टगा दैत छै बेर बेर
कते आ ककरा रहलै धन कहू ने जमैल
पढू ने इतिहास बता दैत छै बेर बेर
✍️ अभिलाष ठाकुर
मात्राक्रम अछि 1222-2112-212-2121
सभ पाँतिमे! सुझाव आमंत्रित अछि 💐
गजलक मतलामे जे रदीफ-काफिया-बहर लेल गेल छै तकर पालन पूरा गजलमे हेबाक चाही मुदा नज्ममे ई कोनो जरूरी नै छै। एकै नज्ममे अनेको काफिया लेल जा सकैए। अलग-अलग बंद वा अंतराक बहर सेहो अलग भ' सकैए संगे-संग नज्मक शेरमे बिनु काफियाक रदीफ सेहो भेटत। मुदा बहुत नज्ममे गजले जकाँ एकै बहरक निर्वाह कएल गेल अछि। मैथिलीमे बहुत लोक गजलक नियम तँ नहिए जानै छथि आ ताहिपरसँ कुतर्क करै छथि जे फिल्मी गीत बिना कोनो नियमक सुनबामे सुंदर लगैत छै। मुदा पहिल जे नज्म लेल बहर अनिवार्य नै छै आ जाहिमे छै तकर विवरण हम एहि ठाम द' रहल छी। एक बेर फेर बहरक कमाल देखू फिल्मी गीतमे देखू। अजुका रचना अछि "ये मुलाकात एक बहाना है"। एहि रचनाक हरेक पाँतिमे 212-212-1222 मात्राक्रम अछि। ई रचना वस्तुतः गजल छै। ई फिल्म "खानदान" मे गाएल गेल रहै। गीतकार छथि नक्श ल्यालपुरी। संगीतकार छथि खैय्याम। गायिका लता मंगेशकर। ई फिल्म 1979 मे आएल रहै जाहिमे जीतेन्द्र, सुलक्षणा पंडित, बिंदिया आदि कलाकार छलथि। एहि ठाम ईहो कहब आवश्यक जे 1965 मे सेहो खानदान नामक फिल्म आएल छल जाहिमे सुनील दत्त एवं नूतन आदि कलाकार छलथि।
