अंगने अंगने देखियौ कोना काँट बुनल छै
भाय भैयारी मे फटेदारीक फाँट उठल छै
समाजक नीक लोक पंचैती नहिये अयतै
छुटल मुँह छौरा के नंगरझाँट देखल छै
गामक लिच्चर धs मसलन घोटै चायपान
मन खाली शैतानी आ बनरबाँट भरल छै
मजगुतहा लठिधरवा करै कुकुरालुझि
तेलही लाठी संग बबुरक झाँट उठल छै
निरदुब्बर सभ छैहिये डर सँ मुह सीने
मोन मे लठियाक गैरिक कोराँट भरल छै
माय-बाप केँ हिस्सा दै मे सभ करै खबखब
बुढ़ारी मे तेरहो गंजन आ डाँट धरल छै
गैरिखोरवा सभ होसथलकै निकहरवा
चुप छै तेँ कि हुनका मुँहक बाँट भेटल छै
"शांतिलक्ष्मी" देखय जकरे लाठी तकरे भैंस
समाज मे आइयो उचितक टाँट पड़ल छै
..................वर्ण-१७................
कोई टिप्पणी नहीं:
एक टिप्पणी भेजें