गजल

प्रस्तुत अछि मुन्ना जीक गजल----

बिनु पीनहुँ नशामे मातल अछि ई दुनियाँ

शोणिते भीजल जेना काटल अछि ई दुनियाँ

सभ कहै अछि दोषी एक-दोसर लोककेँ तें

अपने सही कह'मे लागल अछि ई दुनियाँ

मंद-मंद मुस्की मुदा ठोर अछि काँपि रहल

सिनेहसँ सिक्त मुदा फटल अछि ई दुनियाँ

नजरि बचौने रहैए अपने लोक आब तँ

फाँटसँ फटिआएल साटल अछि ई दुनियाँ

राखू अपन विचार संजोगि क' सदिखन

अहीं सन लोक लेल ठाठल अछि ई दुनियाँ

आखर-----17