गजल

गजल-७ आखर-आखर छल छिड़िआयल जोड़ि देलंहु तऽ गजल बनल अपन कलम केर लाधल चुप्पी तोड़ि देलंहु तऽ गजल बनल भाव पृष्ठ पर शब्दक अरिपन पाईर रहल छी साँझ-परात मोनक पट हम गजल रंग सँ ढोरि देलंहु तऽ गजल बनल गजल-गंग केर घाट गहिंरगर गोंत लगेलौं थाह ने भेटल मन-प्रवाह दिश लगन नाह के मोड़ि देलंहु तऽ गजल बनल टीस उठल किछु मोन पड़ल हम काइन कऽ नोरे-नोर भेलंहु पांइत-पांइत के नोरक पोखरि बोरि देलंहु तऽ गजल बनल वर्ण-पंखुड़ी शब्द-सुमन सँ पांइतक माला गाईथ रहल हम शब्द के भावक सरस सरोवरि घोरि देलंहु तऽ गजल बनल रंग रदीफक सजल काफिया बहरक लय मतला-सँ-मकता बुइध के परती - उस्सर धरती कोड़ि देलंहु तऽ गजल बनल छूटल-टूटल-रूसल सभ किछु गजल-बाट पर संगी आखर "नवल" गजल कहबा पाछा जग छोड़ि देलंहु तऽ गजल बनल ***आखर-२५ (सरल वार्णिक बहर) ©पंकज चौधरी (नवलश्री) (तिथि-१९.०६.२०१२)