गजल

अपन लोक मरखाह बनल छै यौ भैया
नाता रिश्ता आब चोटाह बनल छै यौ भैया

जहर पिब तेजै छै अपन प्राण अपने
जिनगी भवर अथाह बनल छै यौ भैया

नोर पोछत नै आब केऊ ककरो कहियो
दोसरक हँसी कटाह बनल छै यौ भैया

प्रेम बनल आब एत' इतिहासक शब्द
करेजक छंद घबाह बनल छै यौ भैया

लूट मचल अछि चारू दिश इजोरिये मे
जन जनक डलबाह बनल छै यौ भैया

उबडूब करै छी संसारक बैतरणी मे
जिनगी त' फूटल नाह बनल छै यौ भैया

अपन शप्पत द' बनबै अपन दुश्मन
"अमित " शोणित सियाह बनल छै यौ भैया

वर्ण-16

अमित मिश्र